قطرة الندى
مرحبا بك عزيزي الزائر. المرجوا منك أن تعرّف بنفسك و تدخل المنتدى معنا. إن لم يكن لديك حساب بعد, نتشرف بدعوتك لإنشائه

ندوة ابو طاقيه <شعر عامى>

اذهب الى الأسفل

ندوة ابو طاقيه <شعر عامى>

مُساهمة من طرف justfrendes في الإثنين أكتوبر 27, 2008 3:26 pm

احنا معانا اليوم في الندوه وديع وصابر والحاج فاروق
ودى ناس مالشعب عاديه
ودا شادي من الاحرار بيدافع لاجل قضيه
وكمان السيد عصمت بيمثل الشيوعيه
ومعانا السيد شاذلي ودا من حزب الحراميه
ناس كتير بتهتف .ابو طاقيه ابو طاقيه
الراجل الدوغري ال100 100
يا جماعه كده ما يصحش مش عايزين هتفات سياسيه
احنا جايين اليوم للندوه نتكلم مع بعض شويه
وكلامنا هيكون وياكم احنا وكل الافنديه

وديع
انا يا جماعه في حالي بيقولي ان انا شاب مطيع
بس لازم تسمعوا مشكلتي من غير حلها كله يضيع
عايز اتجوز واصون نفسي قبل العهر يا ناس ما يشيع
كل شبابنا قاعد في قهاوي ومخلص كل المواضيع
عايزين نوجد حل لحالهم عايزنهم لينا حصن منيع

الحاج فاروق
اى والله الحق علينا كل شبابنا يا ناس مخنوق
ايوه بقول الحق علينا احنا كمان بنبص لفوق
بس لو تسمعوا مشكلتي انا كمان ما انا عايز اروق
انا فلاح والارض حياتي بتعامل مع كله بزوق
بازرعها وباكل ولدى والحمد لله مرزوق
واسمع منكوا كلام بيحزن وكلام عالفاضى ومشقوق
التخصيص لمصانع بلدي خنقتونا يا ناس بالطوق
ونسيجنا خده واحد هندي جاي بيعبى فالصندوق
لهو راضى يشتري محصولنا ولا راضى يدينا حقوق
طيب اجيب انا حقي منين ولا يا ناس مالفقر اروق

عمي صابر
طب والله كلامه يحزن شايل ازاى في دا كله وصابر
دول عالم مش حاسه بحد ومنسمعشى الا حناجر
وانا علشان مش عايز اشغلكم وحاسس ان الندوه عالطاير
راح ابسط للناس مشكلتي وهلخص وهجيب مالاخر
انا متعين في قطاع عام ودرجتي بيقولوا العاشر
بحمد ربنا عاليجيبه حتي لو اسكن جوه مقابر
مش طالب فيلا وعربيه ولا حتي يكون عندي عماير
ولا بتمنى الثروه تجينى ولا لاروبا عايز اسافر
ولا زى الاحزاب عايز سلطه ولا بنقول عالريس كافر
اللى انا عايزه راتبى يكفى اكل عيالى وهاكون شاكر
لا انا عمري بدخل فى سياسه ولا ليه دعوه بمعابر
دا انا مديون واللى داينى من زهقه جهزلى اساور

السيد عصمت
مشكلتى هتحل مشاكل اسمعنى وانسى اللى فات
كله بيقول مشكلته وناسى ان الشعب اخوات
مش عايزين النص جعان والنص التاني بهوات
انا غرضى مصلحة الشعب مش عايزك تكتبلى شيكات
الحريه هيه حياتنا مش هنجيبها بالخرافات
ولا عايزنها من الاوليه ولا هتجيلنا مالكرامات
والخمره نشرب فبيوتنا ولا هقضى حياتى شحات
متقوليش عيب وحرام ونطول في كلام شعرات
ولا تقولي حجاب وصلاه وتخلي حياتى مطبات
عايز الكل يكون متساوى فى حقوقه او فى الواجبات
ودى مشكلتى عاوزلها حل من تعقيد او صعوبات

شادى
انا مش عارف ليه ساكتين ليه ما نوقف مع بعضينا
دى حقوقنا لازم هنخودها ولا رئيسنا مشترينا
ولا هنفضل نتعب نعرق وفأخرتها نمد ادينا
احنا بنسرق ولا بنشحت ولا دى يعنى مش اراضينا
واحد عمال يزرع ارضه وفأخرتها جاى يشجينا
طب ليه ساكت كده مالاول مد ايديك لينا تقوينا
والتاني صابر وجاى بهمه مش بيكفى الهم علينا
والتانى جاى بافكار غرب لو بإيديه فى النار يرمينا
هى دى بقى الشيوعيه دينا يا ناس تحت رجلينا
ووديع جاى بيشكى فهمه والله يا عمى الهم ملينا
ودا فين الحل لمشكلته واحنا خلاص ضاعت معانينا
عز مغلي حديده علينا بمزاجه بيتحكم فينا
يا نقوم كده على طول ونواجه يا انسى ولادنا من بعدينا
نحط ادينا على خدودنا والايام تحكى فى مأسينا

الشاذلى
مش راح ارد على مشاكلكم انتوا الرد عليكوا حرام
دا الريس تعبان على شانكم هى دى حاجه عايزه كلام
بيقولك سيبنى احكمها ريح نفسك انتا ونام
مش محتاجه يا ناس أأذيكم ولا ازود فالاحكام
كام مره سمعت لمشاكلكم لو نتكلم عالارقام
مش هسمحلك يوم تزعجنى واللى يفكر فيه اعدام

justfrendes
عضو جديد
عضو جديد

عدد المساهمات : 13
نقاط : 0
السٌّمعَة : 0
تاريخ التسجيل : 10/10/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: ندوة ابو طاقيه <شعر عامى>

مُساهمة من طرف قطرة الندى في الأحد أبريل 12, 2009 1:10 pm

مشكووووووووووووور

_________________
avatar
قطرة الندى
مدير المنتدي
مدير المنتدي

عدد المساهمات : 333
نقاط : 526
السٌّمعَة : 1
تاريخ التسجيل : 06/10/2008

معاينة صفحة البيانات الشخصي للعضو http://elnadadrop.yoo7.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى